Ж.Молдағалиев атындағы облыстық әмбебап ғылыми кітапханада 3 мамыр күні Ұлы Отан соғысының ардагері, 3 дәрежелі «Даңқ» орденінің, «Ерлігі үшін» медалінің, «Еңбек Қызыл ту» орденінің иегері Сырлыбай Мұхамбетқалиевтің «Сырым Датұлы туралы дастан» кітабының тұсаукесері мен «Шежіре ғұмыр» атты еске алу кеші өтті.

Шараға Сырлыбай Мұхамбетқалиевтің ұрпақтары – қызы Ботагөз, ұлдары Еділ, Сейіл, Есіл, Ербол және немересі Мейіржан және інісі Мереке Ғұсманұлы, шақырулы қонақтар, студенттер қатысты.

Шарада «Сырым Датұлы туралы дастан» кітабының тұсауын інісі Мереке Ғұсманұлы мен үлкен ұлы Еділ Сырлыбайұлы кесіп, ағамыздың өмірі мен ерліктері туралы естеліктермен Ботагөз Сырлыбайқызы мен Мейіржан Еділұлы таныстырды. Қызметте бірге болған әріптесі Клара Сейітқалиқызы атамыздың тамаша басшы, мейірімді әріптес болғаны туралы естеліктермен бөлісті.

Кеш аясында Ғ.Құрманғалиев атындағы облыстық филармония әншісі Оразов Алтынбек «Қазақстан» әнін орындаса, Бақытжан Раушан «Жауынгер жыры» өлеңін оқыды. Кітапхана мен отбасылық мұрағаттан Сырлыбай Мұхамбетқалиевтің өмірі, ерлігі, марапаттарына арналған «Ерлік елге мұра, ұрпаққа ұран» атты кітап көрмесі мен бейнебаян ұйымдастырылды.

Шара соңында кітапхана директоры Шолпан Қуанышқалиқызы Сырлыбай Мұхамбетқалиевтің ұрпақтарына, шақырылған қонақтарға, барша қатысушыларға, студенттер мен ұстаздарына алғысын білдірді.