3 мамыр күні облыстық кітапханада «Оқитын ұлт – оқырман отбасы» жобасы аясында «Ерлікке тағзым» тақырыбында жазушы, Ұлы Отан соғысының ардагері, Қазақ КСР-нің Мемлекеттік сыйлығының лауреаты, Қазақстанның Халық жазушысы Әзілхан Нұршайықовтың «Ақиқат пен аңыз» кітабы бойынша дөңгелек үстел өтті.

Оқушылардың оқу мәдениетін дамытатын – «Ерлікке тағзым» тақырыбындағы KITAP-FEST жобасы Оралдағы Назарбаев Зияткерлік Мектебі бойынша сәуір айының басында өз жұмысын бастаған болатын. Орал қаласындағы ФМН НЗМ оқушылыры қауымдастығының оқу құзыреттілігін арттыру, Ұлы Отан соғысы туралы көркем әдебиеттерді ұжым болып оқу, түрлі формаларды қолдану арқылы оқуға деген құштарлығын, жүйелі оқу қажеттілігін дамыту мақсатында қолға алынған жобада 9с сынып оқушыларымен ҰОС даңқты қаһарманы, гвардия полковнигі Бауыржан Момышұлының азаматтық, ерлік тұлғасын мүсіндеуге арналған «Ақиқат пен аңыз» роман-диалогы таңдалып, талданды.

Шара қонағы М.Өтемісов атындағы БҚУ-нің қауымдастырылған профессоры, тарих ғылымдарының кандидаты Бақтылы Боранбаева Бауыржан Момышұлының өміріне, соғыс кезіндегі тәжірибесіне және жазушы ретіндегі соғыстан кейінгі тағдырына егжей-тегжейлі тоқталса, онлайн байланысқа шыққан Жамбыл облысы, Жуалы ауданындағы Бауыржан Момышұлы мемориалдық музейінің қызметкері Шураева Дана Бауыржанқызы музеймен таныстырды.

Қорытынды кезеңде әр оқушы шығармадан алған әсерімен бөлісті. Шара соңында оқушылар Бауыржан Момышұлының өмірі мен шығармашылығына арналған кітап көрмемен танысып, кеңінен мәліметтер алды.