«Игі істер күні»

Ежелден бастау алған Наурыз мейрамы үлкен де, кіші де асыға күтетін және үлкен ынтамен тойлайтын мерекеге айналды. Ежелгі жазбаларда күн мен түннің теңелуі жақсылықтың зұлымдықты жеңіп, ақылдың нұрланып, жүректердің тыныштық пен мейірімділікке ашылатын уақыты деп аталуы кездейсоқ емес.

Адам жақсылық жасағанда оның жаны жайланып, өзін кереметтей жеңіл сезінетіні белгілі. Әр адамның бойында жақсылық жасауға ұмтылыс бар. Сондықтан да бір адамның жасаған әрбір жақсылығы көпшілікті ізгі, игі істерге шабыттандыруы мүмкін. Осындай мысалдардың бірі – «Игі істер күні» халықаралық мейрамы, оны мерекелеу күні Наурыз мейрамы – 15 наурызға сәйкес келеді.

Ж.Молдағалиева атындағы облыстық әмбебап ғылыми кітапханасы «Наурыз мейрамын» тойлау тұжырымдамасы аясында «Наурыз мейірімділік мейрамы» іс-шарасын өткізді.

Кешке мейірімділік пен қайырымдылық біріктірілген қонақтар шақырылды. Олар өзге адамдарға шын жүректен махаббат, мейірімділік, жақсылық пен қамқорлық таныта білетін, табиғат пен қоршаған ортаға ұқыпты қарайтын жандар. «Ана үйі» қоғамдық қорының үйлестірушісі – Замзагүл Зайытқызы, «28 петель» клубының өкілдері – Раиса Андреевна Мельниченко және Әсемгүл Абылқасымқызы Дисенова, «Облыстық отбасылық типтегі балалар қалашығы» орталығының биология пәнінің мұғалімі Айнагүл Дамирқызы Менешева, Дәурен Ғұмаров – суретші, «Аялаған алақан» қорының еріктісі қатынасты.