23 сәуір – Дүниежүзілік кітап және авторлық құқық күніне орай дәстүрлі түрде жыл сайын «КІТАП шоу» фестивалі өткізіледі. Биылғы «КІТАП шоу-2023» фестивалін Ұлттық кітапхана Қазақстанның барлық өңірінде бір күнде, яғни 21 сәуірде өткізуді ұсынды. Осы ұсынысты қолдау бағытында бүгін Ж.Молдағалиев атындағы облыстық әмбебап ғылыми кітапханада «КІТАП шоу-2023» фестивалі ұйымдастырылды. Кітап фестивалін Батыс Қазақстан облысы мәдениет, тілдерді дамыту және архив ісі басқармасының басшысы Дүйсенов Сайран Темірғалиұлы ашып, құттықтау сөз сөйледі.

Ақын, Қазақстан ақын-жыршылар одағының мүшесі, Ақжайық ауданының Құрметті азаматы Сағынтай Бисенғалиев, педагогика ғылымдарының докторы, профессор, Қазақстан Педагогикалық ғылымдар академиясының академигі, Махамбет Өтемісұлы атындағы БҚУ-нің «Рухани жаңғыру» институтының директоры Абат Қыдыршаев және жазушы, Қазақстан Жазушылар және Журналистер одағының мүшесі, Халықаралық «Алаш» әдеби сыйлығының иегері, «Шабыт» фестивалінің лауреаты, «Жайық үні» газетінің редакторы Мира Шүйіншәлиева сөз сөйлеп, кітап сүйер оқырман қауымды кітап күнімен құттықтады.

Шара барысында «Жайықтың жауһарлары» инсталляциялы кітап көрмелер циклы аясында бес алаң құрылды.
1-алаң «Тұғыры биік талант»/ Хамза Есенжанов
2-алаң «Жұбанның жыры-ғасырлар үні»/ Жұбан Молдағалиев
3-алаң «Асыл сөздің алдаспаны»/ Қадыр Мырзалиев
4-алаң «Жырына жанарымен нәр жинаған»/ Қайрат Жұмағалиев
5-алаң «Алаштың Ақұштабы»/Ақұштап Бақтыгереева

Бұл алаңдарда кітап көрмелер таныстырылып, көріністер қойылып, қаламгерлердің шығармалары оқылды.
Сонымен қатар «КІТАП шоу-2023» фестиваліне қатысушыларға қызыққа толы бағдарламалар ұсынылды.
Көрмелер:
BookCrossing /кітап алмасу
«Ой-маржаны-кітап»/ жаңа әдебиеттер көрмесі
«Талғам мен таным табиғаты жарасқан тұлға» / «Бір ел – бір кітап» республикалық акциясы бойынша Төлен Әбдіковтің шығармаларын насихаттау, кітап көрмесін таныстыру.
«Әдебиет марғасқалары облыстық кітапханада»/ фотокөрме
«Қолөнер мен қылқалам»/шеберлік сағаты

Поэтикалық слем:
Қазақ ақыны, жауынгер Жұбан Молдағалиевтың «Мен қазақпын» поэмасына 60 жыл толуына орай поэтикалық слэм өткізілді. Поэтикалық слэмде ақынның «Мен қазақпын» поэмасын Бәйтерек ауданы, Достық ЖОББМ оқушылары поэманы толықтай жатқа оқып шықты.

Шығармашылық кештер:
Өлеңі-өміріне, өмірі-өлеңіне айналып кеткен ақын, Қазақстан Жазушылар және Журналистер одақтарының мүшесі, Т. Айбергенов атындағы сыйлықтың лауреаты және Сейдахмет Бердіқұлов атындағы сыйлықтың лауреаты, «Ерен еңбегі үшін» медалінің иегері Ғайса-Ғали Сейтақтың «Жайықтың жайсаң ақыны» атты шығармашылық кеш және ҚР еңбек сіңірген артисі, Ғ. Құрманғалиев атындағы облыстық филармонияның әншісі Таудаева Сауле Жаманқызының 65 жасқа толуына арналған «Саз Саулесі» атты кездесу кеші өткізілді.
Шараға зиялы қауым өкілдері, жоғары, арнаулы оқу орындарының студенттері, мектеп оқушылары, кітапханашылар қатысты. Шара күні бойына жалғасты.