22 сәуір – Ұлттық кітап күні мен Кітапханашылар күніне орай «Ұлттық кітап күні – руханият мерекесі» атты ауқымды кітап фестивалі өтті.
Фестивальдің ашылу салтанаты Жұбан саябағында қазақ поэзиясының алып тұлғасы, шынайы сөз зергері Жұбан Молдағалиевтің ескерткішіне тағзым етумен басталды.
Салтанатты шараға БҚО әкімінің орынбасары Меңдіғалиев Қайыржан Ермекұлы, өлкетанушы, қоғам және мәдениет қайраткері, «Құрмет белгісі», «Халықтар достығы», «Парасат» ордендерінің иегері Ақбай Жайсаң Досболатұлы, «Алаш» әдеби сыйлығының, «Парасат» орденінің иегері, Қазақстан Жазушылар одағы БҚО филиалының төрайымы, ақын-жазушы Мұштанова Дариға Ғазезқызы және БҚО Мәдениет, тілдерді дамыту және архив ісі басқармасы басшысының орынбасары Қамбетов Медхат Мұсаұлы қатысып, ескерткішке гүл шоқтарын қойды.

Шара барысында Мұштанова Дариға Ғазезқызы сөз сөйлеп, ұлттық әдебиеттің маңызы мен кітаптың рухани құндылығына тоқталды.
Х.Бөкеева атындағы облыстық қазақ драма театрының әртістері «Жыр мен ойдың үш алыбы» атты театрландырылған қойылым ұсынып, көрермендерге ерекше әсер сыйлады. Жергілікті қаламгерлер Ж.Молдағалиев, Қ.Мырза Әли, Ж.Набиуллин, М.Есламғалиұлы образдарында олардың шығармаларынан үзінді оқыды.
Сонымен қатар, облыстық байқаулардың лауреаты, Ғ.Құрманғалиев атындағы облыстық академиялық филармонияның әншісі Айбек Тұрарбеков «Атамекен» әнін орындады.
Фестиваль аясында көрермендер мен зиялы қауым өкілдері «Кітап қалашығы» аллеясында ұйымдастырылған кітап көрмелерімен танысып, кітап дүкендерінің жәрмеңкесін тамашалады.