24 шілде күні Жұбан Молдағалиев атындағы облыстық орталық әмбебап ғылыми кітапхананың 155 жылдық мерейтойына арналған «Бас кітапхана – ортақ мұра, ортақ тарих» жобасы аясында Жаңақала аудандық орталықтандырылған кітапханалар жүйесінің ұйымдастыруымен «Жұбан кітапханасына жыр шашу» атты облыстық әдеби-сазды жыр кеші өтті.
Мерекелік шара қазақ поэзиясының көрнекті өкілі, Қазақстанның Халық жазушысы Жұбан Молдағалиевтің ескерткішіне гүл шоқтарын қою рәсімімен басталды. Ескерткіш алаңында кітапхананың бай тарихынан сыр шертетін инсталляциялық кітап көрмесі ұйымдастырылып, келушілер назарына ұсынылды.

Шараға Жаңақала өңірінің ақын-жазушылары, өнерпаздары, мәдениет саласының өкілдері мен кітапсүйер қауым қатысып, туған өлкенің әдебиеті мен мәдениетін насихаттауға өз үлестерін қосты.

Кеш бағдарламасы аясында өңір қаламгерлерінің кітап көрмесі ұйымдастырылды. «Әуенге өрілген жыр» атты акустикалық бөлімде ақындар өз өлеңдерін оқып, өнерпаздар ән мен күйден шашу шашты. Сонымен қатар көрермендер назарына Жұбан Молдағалиевтың өмірі мен шығармашылығына арналған шағын композициялық көрініс ұсынылды.
Ал «Жыр шашқан туған өлке» бөлімінде Жаңақала өңірінен шыққан әншілер туған жерге арналған әндерді орындап, мерекелік кештің көркін қыздыра түсті. Кеш кітапхананың бай мұрасын насихаттап, мерейтойдың мәнін айқындай түсті.