Ғ. Құрманғалиев атындағы облыстық академиялық филармонияның концерт залында Кітапханашылар күніне арналған салтанатты шара өтті.
Шара шымылдығын Қарлығаш Қадырбекова өнер орталығының бишілері қазақтың әсем биі – «Көктем нұрымен» ашып, көрерменге ерекше көңіл-күй сыйлады.
Кітапханашылар күні қарсаңында сала мамандарының еңбектері еленіп, бірқатар кітапханашылар алғыс хаттармен және төсбелгілермен марапатталды. Сонымен қатар филармония әншілері мен бишілері өнер көрсетіп, кештің көркін қыздырды. Ардагерлерге құрмет көрсетіліп, гүл шоқтары табысталды.

Мерекелік кеш аясында кітапхана оқырмандарына арнайы номинациялар табысталды:

🔹 «Кітапхана жанашыры» – тіл жанашыры, мемлекеттік қызмет ардагері, кітапхананың 40 жылдық тұрақты оқырманы Әлжанова Гүлнар Жәрдемқызына;
🔹 «Үздік оқырман» – Хамза Жандос Жанұзақұлына;
🔹 «Белсенді оқырман» – Жақыптегі Ернарға;
🔹 «Үздік брайлист-оқырман» – Базарбай Мөлдірге берілді.
Сондай-ақ «Ақсұңқар» домбырашылар ансамблі «Ер Тұран» күйін орындап, ұлттық өнердің көркем үлгісін паш етті.

Кітапхана ісіне қолдау көрсетіп жүрген серіктестер де назардан тыс қалмады. «Полиграфсервис» баспа орталығы «Оралдың ең үздік баспасы» аталымымен марапатталса, «Жайық үні», «Самал», «Ел және мұғалім» газеттері «Үздік ақпараттық қолдаушы» аталымына ие болды.

Кеш барысында Х. Бөкеева атындағы облыстық қазақ драма театрының әртісі, мәдениет саласының үздігі Нүргүл Жұбатова «Бір ел – бір кітап» республикалық акциясы аясында жыл кітабы болып таңдалған Қабдеш Жұмаділовтың «Тағдыр» романынан үзінді оқып, көрерменге ерекше әсер қалдырды.