23 шілде күні Ж.Молдағалиев атындағы облыстық орталық әмбебап ғылыми кітапханасының қызметкерлері Батыс Қазақстан облысы әкімдігі білім басқармасының Балалар мен жасөспірімдер туризм және экология облыстық орталығының «Еуразия» балалар лагерінде болып, танымдық-ойын-сауық бағдарламасын ұйымдастырды.

Бағдарлама барысында балалар қызықты викториналарға, интеллектуалдық ойындарға және логика, зейін мен тапқырлықты дамытуға арналған сайыстарға белсене қатысты. «Бәйге», «Логикалық сұрақтар», «Кім жылдам?», «Жұмбақ әлемі», «Блиц-сауалнама» және «Үш кеңес» сияқты тапсырмалар қатысушылардың ерекше қызығушылығын оятты. Олар өз білімдерін сынап қана қоймай, жаңа мәліметтермен танысып, таным көкжиегін кеңейтті.

Балалар әр тапсырмаға үлкен ынтамен қатысып, тапқырлықтары мен білімдерін көрсетіп, топпен жұмыс істеу қабілеттерін де танытты. Шара жылы жүзді қарым-қатынасқа, көтеріңкі көңіл-күйге және жарқын әсерлерге толы болды.

Кездесудің ерекше сәттерінің бірі – кітапхана қызметкерлері өздерімен бірге алып келген кітап көрмесі болды. Балалар кітаптарды қызығушылықпен парақтап, өздеріне қажетті әрі қызықты ақпаратпен танысып, кітап әлеміне деген қызығушылықтарын арттырды.