Жұбан Молдағалиев атындағы облыстық орталық әмбебап ғылыми кітапхана мен М.Өтемісов атындағы Батыс Қазақстан университетінің ғылыми кітапханасының бірігуімен «Библио тур» жобасы аясында Вильгельм Гриммның 240 жылдығына арналған ағайынды Гриммдердің ертегісі негізінде «Бременские музыканты» атты мюзикл-қойылымы қойылды.
Шара барысында студенттер неміс тілінде жазушылардың өмірі мен шығармашылығы туралы мазмұнды мәлімет ұсынып, арнайы кітап көрмесін ұйымдастырды.
Кештің көркін ашқан қойылымға ЭХО студенттік театры белсене қатысып, жоғары деңгейдегі сахналық өнерімен көрермен ықыласына бөленді. Театр жетекшісі – филология факультетінің «Шетел тілдері мен әдебиеті мұғалімдерін дайындау» білім беру бағдарламасының аға оқытушысы Шунайбекова Клжиян Мендыгалиқызы.
Шараға Қазақстандық немістер қоғамдық қоры мүшелері, университет оқытушылары мен студенттері, сондай-ақ Ж.Досмұхамедов атындағы жоғары педагогикалық колледжі студенттері қатысып, мәдени кештің мазмұнын арттыра түсті.