Мемлекет басшысы Қасым-Жомарт Кемелұлы Тоқаев: «Шын мәнінде озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда қайтадан жандандырып, барынша орнықтыруымыз керек» деп атап өткен болатын.

Осы мақсатта 30 қаңтар күні кітапханада «Рухани уақыт: поэзия әлемі, проза шыңы» жобасы аясында «BookWave» оқу клубы құрылып, алғашқы отырысы өтті.

Шара барысында Құрманғазы атындағы саз колледжінің кітапхана бөлімінің оқытушысы Индира Қайыршаққызы, Махамбет Өтемісов атындағы Батыс Қазақстан университеті филология факультетінің І курс студенті Жақыптегі Ернар кітап оқудың маңыздылығы, рухани даму мен тұлға қалыптастырудағы рөлі туралы ойларын ортаға салды.

Сонымен қатар «BookWave» оқу клубына кітап оқуға қызығушылығы бар оқырмандар ерікті түрде қабылданды. Клуб мүшелерінің ортақ келісімімен бірге оқып, талқылайтын кітаптар таңдалып, қатысушылар тың идеяларымен және ой-пікірлерімен бөлісті. Алдағы уақытта өткізілетін негізгі іс-шаралардың жоспары да құрылды.

Алғашқы клуб отырысына Махамбет Өтемісов атындағы Батыс Қазақстан университетінің, Батыс Қазақстан инновациялық-технологиялық университетінің, Ж.Досмұхамедов атындағы жоғары педагогикалық колледждің студенттері қатысты.