Алғазы Гүлнұр Маратқызы – Орталық қалалық кітапханасының өнер және ұлттық салт- дәстүрлерді дамыту бөлімінің кітапханашысы
Кітапханалық жұмыс өтілі – 14 жыл.
Гүлнұр Маратқызы 1985 жылы 6 қаңтарда дүниеге келген. Білімі жоғары педагогикалық. 2003-2007 жж. М. Өтемісұлы атындағы БҚМУ «Орыс филологиясы» факультетін «Орыс тілі және әдебиетінің мұғалімі» мамандығы бойынша, 2018-2020 ж.ж. осы оқу орнын «Қазақ тілі және әдебиетінің мұғалімі» мамандығы бойынша бітірген. Жоғары санатты кітапханашы. 2008 жылы әдістемелік бөлімде, 2015 жылдан бастап өнер бөлімінде қызмет атқаруда. Гүлнұр Маратқызы жергілікті өнер тұлғаларымен кездесулерді, алуан тақырыптарда кештерді ұйымдастырып, ұлттық салт-дәстүрімізді, мәдениетімізді насихаттап келеді. 2011-2018 ж.ж. №5517 әскери бөлімінің жанынан құрылған «Жайық жігері» жастар қоғамдық бірлестігінің төрайымы қызметін атқарды. Бірлестік Отан алдындағы әскери борышын өтеуге келген сарбаздардың, яғни ел ертеңі өскелең жас ұрпақтың мәдени-эстетикалық, әдеби, тарихи, саяси білім деңгейлерін көтеру бойынша және мемлекеттік тілдің қолданыс аясын кеңейту, ұлттық өнерді насихаттау бойынша нәтижелі жұмыс жүргізді. Бірлестіктің ұйымдастыруымен «Қазақстан – татулық мекені», «Күй–қазақтың қанаты», «Әлихан Бөкейханов – Тәуелсіздіктің жаршысы», «Кенесары Қасымұлы бастаған қазақ халқының ұлт-азаттық қозғалысына 180 жыл», «Тұңғыш қазақ генералы – Шәкір Жексенбаев», «Ұлт мақтанышы – Ахмет Жұбанов» т.б. тақырыптарда көптеген шаралар ұйымдастырылды. Сонымен қатар негізгі қызметіне қосымша орталық кітапханада ашылған латын әліпбиі кабинетінің жұмысын жүргізді. Бұл үшін 2019 жылы 18-29 наурыз аралығында Қазақ Ұлттық қыздар педагогикалық университетінің біліктілікті көтеру орталығында «Латын әліпбиін оқытудың инновациялық әдістері» атты 72 сағаттық курсын; сол жылдың 10-18 маусым аралығында Ш.Шаяхметов атындағы «Тіл-қазына» ұлттық ғылыми-практикалық орталығында «Жаңа емлені оқыту әдістемесі» тақырыбындағы тренерлерді дайындауға арналған 72 сағаттық республикалық курста оқып келді. Латын әліпбиін оқытушы-тренер ретінде бірнеше мемлекеттік мекемеде сабақ берді. Гүлнұр Маратқызы қалалық мәдениет және тілдерді дамыту бөлімінің жұмыс жоспарына сай өткізіліп жүрген қала көлеміндегі байқаулар, кездесу кештерінің тұрақты түрде ереже, сценарийлерін т.б. жазды. Мысалы, «Ақ бата – асыл мұра» қалалық батагөйлер байқауы, қалалық Абай оқулары, Сәкен оқулары, Фариза оқулары байқауы, жастар арасында «Мақал-мәтел – сөз мәйегі» байқауы т.б. Гүлнұр Маратқызы Батыс Қазақстан облыстық әкімдігінің, Орал қалалық әкімдігінің, «Нұр Отан» партиясы Орал қалалық филиалының, «Батыс» өңірлік қолбасшылығының, БҚО тілдерді дамыту басқармасының т.б. көптеген алғыс хаттарымен марапатталды; бірнеше сертификаттың иегері. БАҚ жарияланған мақалалардың авторы болып табылады. Өз ісіне жауапты, жан-жақты, білікті маман.