«Парасат жолы» орталығының басшысы зиялы қауым өкілдерімен кездесті.

Батыс Қазақстан облысына республикалық «Парасат жолы» орталығының басшысы Сәдібек Түгел және ҚР Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) Төрағасының кеңесшісі Жазира Жылқышиева жұмыс сапарымен келді. Ж.Молдағалиев атындағы Батыс Қазақстан облыстық әмбебап ғылыми кітапханасының «Парасат жолы» орталығында өткен жиынға БҚО әкімінің орынбасары Нарымбетов Бақытжан Хаберұлы, ақын, Қазақстанның еңбек сіңірген қайраткері, Халықаралық «Алаш» әдеби сыйлығының лауреаты Ақұштап Бақтыгереева, өлкетанушы, мәдениет саласының ардагері Жайсаң Ақбай мен облыстық ардагерлер кеңесінің төрағасы Берген Мақсот, ақын, Қазақстан Жазушылар одағының мүшесі, ҚР мәдениет саласының үздігі, Орал қаласының құрметті азаматы Нәріков Айтқали, Ж.Молдағалиев атындағы облыстық кітапханасында ашылған «Парасат жолы» орталығының жетекшісі ақын, ардагер ұстаз, жұбантанушы, ҚР Білім беру ісінің үздігі Үзілдік Елеубайқызы, Қазақстан Жазушылар одағының мүшесі, Халықаралық «Шабыт» фестивалінің лауреаты, жазушы-журналист Мира Шүйіншәлиева қатысты. Республикалық «Парасат жолы» орталығының басшысы С.Түгел және Агенттік Төрағасының кеңесшісі Ж.Жылқышиева кітапхананың, «Парасат жолы» орталығының жұмыстарымен танысып, зиялы қауым өкілдерімен кездесті.

Кездесу барысында Агенттік Төрағасының кеңесшісі Ж.Жылқышиева елімізде сыбайлас жемқорлықтың алдын алу мақсатында жүргізіліп жатырған жұмыстарға тоқталып, «Парасат жолы» жобасының маңыздылығын түсіндірді. «Парасат жолы» жобасы Агенттік және Мәдениет және спорт министрлігі бастамасымен бастау алған. Ол зиялы қауым өкілдерін қатыстыра отырып адалдық, парасаттылық, әділеттілік қағидаттарын қалыптастыруға, сондай-ақ ұлттық мәдениет пен руханият құндылықтарын қоғамда ілгерілетуге бағытталған жаңа жоба болып табылады. Өз кезегінде облыстың зиялы қауым өкілдері атқарылып жатырған жұмыстарға белсене араласатындықтарын атап өтіп, «Парасат жолы» орталығының жұмысына сәттілік тіледі.

Жиын соңында Батыс Қазақстан облысы әкімінің орынбасары Нарымбетов Бақытжан Хаберұлы Ақұштап Бақтыгерееваға 8 наурыз – Халықаралық әйелдер күніне орай Президент Қасым-Жомарт Тоқаевтың мерекелік құттықтауын және гүл шоғын табыс етті.