Ақын,Қазақстан Жазушылар одағының мүшесі, ҚР мәдениет саласының үздігі, Тасқала ауданының құрметті азаматы Айтқали Нәріковтің 80 жасқа толуына орайоблыстық «Қазақ тілі» қоғамы қоғамдық бірлестігі, Ж.Молдағалиев атындағы Батыс Қазақстан облыстық әмбебап ғылыми кітапханасы мен «Тасқала аудандық мәдениет, тілдерді дамыту, дене шынықтыру және спорт бөлімі» ММ ұйымдастыруымен «Жылдар жылжып барады» атты әдеби кездесу онлайн байланыс арқылы оздырылды. Аталмыш шараны Жұбан Молдағалиев атындағы облыстық кітапханасынан Алтынбек Әбутәліұлы, Оян ауылынан Мирас Сансызбайұлы жүргізді. Модератор Алтынбек Әбутәліұлы Айтқали ағаны 80 жас мерейтойымен құттықтап, сиясы кеппеген «Жойқын жылдар жаңғырығы» және «Дала дарабозы» атты жаңа кітаптары туралы сөз қозғады. Оян ауылынан байланысқа шыққан қатысушылар ақынмен сұрақ-жауап алмасты және Оян ЖББ мектебінің 10-сынып оқушысы Мағзомова Аружанның «Ақынның жүріп өткен жолы…»атты слайд-таныстырылымы көрсетілді. Кеш қонағы Талап Таймасұлы ақынның шығармашылығы жөнінде әңгімелеп, өзінің «Тоғыс» атты өлеңдер жинағын Айтқали Нұрышқалиұлына тарту етті. Бүгінгі кеш оқырман мен ақын арасындағы сыр менен жыр өрілген әдемі әдеби кеш болды.