Кеше Ақжайық аудандық кітапханасының ұйымдастырумен Абай мектеп-гимназиясында өткен тағылымы терең шара осылай аталып, дархан даланың дарынды ұлы, Қазақстан Республикасының халық жазушысы, КСРО және Абай атындағы мемлекеттік сыйлықтың лауреаты Жұбан Молдағалиевтің 105 жылдығын ауданда атап өтуде тағы бір игі ісі болды. Бұл шарада ақынның шығармаларын балғын оқушылар мәнерлеп оқып беріп, ақын туындыларындағы туған жер, Отанды сүю, атамекенге сағыныш, елжандылық сынды ұғымдарға тереңінен бойлады.

Алдымен Жұбан Молдағалиев туралы бейнеролик көрсетіліп, оның көрерменге тастаған ойын оқушы Милана Максим ақын өмірбаянына жасаған шолуымен толықтырды.

«Дала дегеніміз мен үшін – халқымның жаны сияқты жомарттық пен кеңдік ,өрлік пен аңқылдақ ашықтық, ешқандай қалтарысы жоқ, бәрі де көз алдыңда. Дала маған әрдайым қанат береді, қуаныш ұсынады». Бұл қазақтың маңдайына біткен текті перзент Жұбанның өз сөзі. Шығармашылығына арқау еткен дала тақырыбы ақынға ерек шабыт бергені осы цитатадан анық көрініп тұр емес пе?! Туған жеріне табынып, басын иген, оның құдіретін жырмен өрнектеген ақынның «Табиғатқа жер-ана табынады», «Таңырқаймын шыңдарына таулардың», «Туған жерде тағы да», «Сағындым, Жайық», «Көкшетау», «Ақжайық», «Өлеңті таңы», «Базартөбе» өлеңдерін гимназияның шәкірттері Нұртілеу Талапқали, Мейірім Қойшыбай, Ерасыл Жасұлан, Нәзира Бақтығали, Фариза Алибаева, Айна Төлегенова, Іңкәр Амангелді, Нұрсауле Абат, Дәулет Әлібеков, Ермек Сайын, Назерке Орынғали, Аружан Рашид мәнерлеп оқып берді. Жұбанның жігерлі жыры шеру тартқан бұл керуенді мектеп-гимназияның 9 а сынып оқушылары дайындаған «Ой-қой, дала» дастанының ізіндегі әдеби-монтажды көрініс өте мәнді де шебер түйіндеді.

Шараның соңында оқушылар мен ұстаздар қосылып, Жұбан Молдағалиевтің сөзіне жазылған Ілия Жақановтың «Еділ-Жайық» әні шырқады.