Аудандық кітапхананың модернизациядан кейінгі ашылуына орай өткен басқосу рухани орданың өткенімізді ұмытпау, бүгінімізді бекемдеу, келешегімізді қалыптастыру тұрғысында мәні зор екенін тағы бір айғақтады.

Мәжіліс залында аудан қонақтары, тұрақты оқырмандар, кітапханамен тығыз байланыс орнатқан мекеме өкілдері сала мамандарын құттықтап, сый-тартуларын табыс етті. «Шуақ» әйелдер қоғамдық бірлестігінің атынан Әсел Сатқанқызы кітапқа құштар ұрпақты тәрбиелеуде кітапхананың рөліне салмақ түсірсе, Ақжайық аграрлық техникалық колледждің директоры Жарас Мирұлы кітапханамен байланыс студенттердің білім көкжиегін кеңейтуге, ізденімпаздығын арттыруда үлкен жетістіктерге жетелегенін атап, кітапханашыларға ризашылығын арнады.

Осы шараның тізгінін қолына ұстаған Мейірман Шәкенов Жұбан Молдағалиевтің 105 жылдығына орай кітапханада көзделген шаралар, ақынның туған жеріндегі ізбасарларының шығармашылығын насихаттау туралы да ой бөлісті. Ал осы қуанышты шараға арнайы келген «InDrive» халықаралық сервисінің негізін қалаушы Арсен Томский кітапханаға өзінің кітабын қолтаңбасымен сыйлады.

Шараны қорытындылаған аудан әкімі Мұрат Сердалин ел атынан қоғамдық қордан келген өкілдерге сыйлық табыстады.

– Бүгін кітапханамызда жаңа технологиялар, электронды ресурстар, оқу залдары мен шығармашылық кеңістіктері пайда болды. Демек, осыған дейін де білім мен ізденіске даңғыл жолды нұсқаған кітапхананың жұмысы заманауи тұрғыда жаңа сипат алатыны анық. Бұл өз кезегінде ұл-қыз бен жастарымыздың білім алуына, шығармашылық қабілеттерін дамытуына және жаңа идеялармен бөлісуіне мүмкіндік береді. Кітапханамыздың жаңа кезеңі басталды, ізденімпаз ұрпақ көбейсін, тың бастамалар өріс алсын! Іске сәт! – деді аудан басшысы.

Басқосудың соңында көпшілік «Ақжайық әсем әнімсің» әнін әншілермен бірге қосылып шырқады.