Бүгін 5 мамыр күні Ж.Молдағалиев атындағы облыстық әмбебап ғылыми кітапханасында «Әдеби өлкетану: қоғамдық сананы рухани жаңғырту (Орал өңірі ақын-жазушыларының шығармашылық мұрасы. ХХ-ХХІ ғасырдың басы. 2-кітап.)» тақырыбындағы монография (авторлары: Зейнолла Мүтиев, Жангүлім Мұханбетова) мен хрестоматияның (құрастырушылар: Зейнолла Мүтиев, Жангүлім Мұханбетова, Айдарбек Ақболатов) тұсаукесер салтанаты болып өтті.
Әдеби өлке мұрасын зерттеу нысанына алған ғылыми монографияның 2-кітабында Орал өңірі ақын-жазушыларының ХХ ғасырда жарияланған шығармалары (поэзия, проза, драматургия т.б.) зерттеліп, өлке қаламгерлерінің өлең сөз бен көркем сөздегі жаңалықтары: тақырып пен идея, кейіпкерлер жүйесі, көркемдік-шеберлік мәселелері қарастырылған. Хрестоматияның 2-кітабында өңірдің ақын-жазушыларының ХХ ғасырда жарияланған шығармалары (поэзия, проза т.б.) енгізілген. Хрестоматияға ұсынылған көркем шығармалардың басты идеялары: туған жерге, атамекенге деген сүйіспеншілік, батылдық пен өшпес ерлік, адамгершілік пен еңбексүйгіштік.
Шара барысында ақын, Қазақстан Жазушылар Одағының мүшесі, ҚР Мәдниет саласының үздігі, Орал қаласының құрметті азаматы А.Нәріков, жазушы Қайыр Бектұрғановтың жары Н.Жұбайқызы, Батыс Қазақстан инновациялық-технологиялық университетінің профессоры, ф.ғ.д. М.Сабыр, БҚО Мәдениет басқармасының бөлім басшысы А.Лұқпанова жаңа кітаптың тұсауын кесіп, ақжарма тілектерін білдірді.
Батыс Қазақстан инновациялық-технологиялық университетінің профессоры, ф.ғ.д. М.Сабыр «Өлке әдебиеті – қазақ әдебиетінің құрамдас бөлігі», М.Өтемісов атындағы Батыс Қазақстан университетінің қауымдастырылған профессоры, ф.ғ.к, доцент Р.Сұлтанғалиева «Өлке әдебиетін зерттеу – бүгінгі күннің талабы мен парызы», педагог-шебер, С.Сейфуллин атындағы Дарынды балаларға арналған №11 мектеп-интернат кешенінің мұғалімі А.Байжиенова «Мектеп мұғалімдері мен оқушыларға пайдасы бар еңбек» тақырыбындағы баяндамаларын жасады.
ZOOM бағдарламасы арқылы байланысқа шыққан Х.Досмұхамедов атындағы Атырау университетінің профессоры, филология ғылымдарының докторы Қ.Жүсіп, М.Өтемісов атындағы Батыс Қазақстан университетінің қауымдастырылған профессоры, ф.ғ.к, доценті Ж. Шайекенов, әл-Фараби атындағы Қазақ Ұлттық Университетінің доценті, философия (PhD) докторы Қ.Алдашева, М.Өтемісов атындағы Батыс Қазақстан университет Ғылым бөлімінің жетекшісі, философия (PhD) докторы М.Какишев баяндама жасап, қос кітаптың авторларына шығармашылық табыс тіледі.
Шара соңында кітап авторлары М.Өтемісов атындағы Батыс Қазақстан университетінің қауымдастырылған профессоры, ф.ғ.к, доцент З. Мүтиев, М.Өтемісов атындағы Батыс Қазақстан университетінің доценті, философия (PhD) докторы А.Ақболатов, М.Өтемісов атындағы Батыс Қазақстан университетінің оқытушысы, педагогика ғылымдарының магистрі Ж.Мұханбетова ақын-жазушыларға, ғалымдарға, кітаптың тұсаукесерін жүргізген М.Өтемісов атындағы Батыс Қазақстан университетінің доценті, т.ғ.к., БҚО мәслихатының депутаты Ж.Жақсығалиевке, кітапхана ұжымына, шараға қатысушыларға алғыстарын білдірді.