«2021 жылдың үздік жас кітапханашысы»

«2021 жылдың үздік жас кітапханашысы» облыстық байқау
ҚР Ұлттық кітапханасы және «Қазақстандық Кітапханалық Одақ» заңды тұлғалар бірлестігі Қазақстанның көрнекті кітапхана қайраткері Нәзира Қожахметқызы Даулетованың 95 жылдығына орай «2021 жылдың үздік жас кітапханашысы» атты республикалық байқау жариялады. Осы іс-шараны басты негізге ала отырып, Ж.Молдағалиев атындағы облыстық әмбебап ғылыми кітапханасы облысымыздағы жас кітапханашы мамандардың білімі мен біліктілігін шыңдау бағытында облыстық «2021 жылдың үздік жас кітапханашысы» байқауын ұйымдастырды.
Сайыс алдын ала әр аудан, облыстық және қалалық кітапханаларда өткізіліп, іріктелген 15 үміткер облыстық байқауға жолданған болатын.
Облыстық байқау екі кезең бойынша өткізілді. Бірінші кезең онлайн түрінде өткізіліп, қатысушылар «Жаңа заман кітапханалары» немесе «Кітапхана кәсібінің қайта жаңғыруы» тақырыбындағы эссе жазу, қатысушының кәсіби және жеке қасиеттерін, кітапханашы мамандығының маңыздылығын, қатысушының түрлі жобалар мен байқауларға қатысқанын және өзі жұмыс жасайтын кітапхана мекемесінің рөлін ашатын портфолио дайындаса, екінші кезеңде «Өзін-өзі таныстыру», «Кітапханалық жобаларын қорғау», «Білімді мыңды жығады» ұяшықтарда дайындалған кәсіби сұрақтарға жауап беру, өз өнерін көрсету кезеңдері бойынша сынға түсті.
Байқауға мәдениет саласының ардагері, кітапхана ісінің шебері Исатаева Роза Жақияқызы, Хамза Есенжанов атындағы облыстық балалар және жасөспірімдер кітапханасының ғылыми-әдістемелік жұмыс кеңесшісі Өтешова Звайда Бисенқызы, Ж.Молдағалиев атындағы облыстық әмебап ғылыми кітапхана директорының орынбасары Сағынова Нұрлыгүл Аяпқызы қазылық етті.
Байқау қорытындысы бойынша: Бас жүлдені Жәнібек аудандық орталықтандырылған кітапханалар жүйесінің Күйгенкөл ауылдық модельді кітапханасының кітапханашысы Өтемісова Гүлдара Фархатқызы иеленіп, республикада өтетін үлкен додаға жолдама алды.

Әлеуметтік желіде кітапханамен бірге болайық!
Facebook
Instagram