17 ақпан күні биылғы жылы атап өтілетін мерейлі күндерге, «Бір ел-бір кітап» республикалық акциясына арналған «Ұлтымыздың ұлы тұлғалары» тақырыбында кітап көрмелер топтамасының таныстырылымы өтті.
Салтанатты шара «Гүлдер» би тобының орындауындағы бимен ашылып, «Ұлтымыздың ұлы тұлғалары» топтамасы бойынша «Болмысы бөлек тұлға», «Өр рухты Махамбет», «Алаштың асыл арысы», «Алаш идеясының жаршысы», «Асылдың сынығы: Мұрат Әуезов 80 жаста» тақырыптарындағы кітап көрмелер таныстырылды.
Шарамыздың құрметті қонақтары №40 ЖОББМ қазақ тілі мен әдебиетінің пән мұғалімі Айнұр Нұржанқызы Сабыр мен жастар арасында кітап оқуды насихаттап, жақсы бастамаға жол ашып жүрген «Рухтим» клубының жетекшісі Қуан Армат Құлымбекұлы халқымыздың біртуар азаматтары бүгінгі өскелең ұрпаққа өнеге екенін жеткізді. Шара барысында «Мектептен тыс жұмыс орталығының» «Жас дарын» үйірмесінің тәрбиеленушілері Кәусәр Наурызғали, Тарғын Әбілмансұр, Арайлым Серғазиева аталмыш тұлғалардың шығармашылығынан өлеңдер оқыса, «Еркем-ай» вокал үйірмесінің тәрбиеленушісі, бірнеше ән байқауларының жүлдегері Қуандық Саян «Отаным-Қазақ елі» әнін шырқады.
Облыстық кітапхана директорының орынбасары Ұрқия Жиеналиева қорытынды сөз сөйлеп, қатысушыларға алғыс хат табыс етті.
Шараға мектеп кітапханашалары, студенттер, БАҚ өкілдері қатысты.