Бүгін Жұбан Молдағалиев атындағы облыстық әмбебап ғылыми кітапханасында белгілі кәсіпкер, филантроп, қаламгер, «Құрмет»,«Парасат» ордендерінің иегері Оралбай Қожамжарұлы Ботбайдың «Төле би», «Бәйдібек баба», «Нұрлы нөсер», «Нысап сайын береке», «Келешекке жетелеген 7 сапар» атты кітаптарының тұсау кесу рәсімі болып өтті.
Жаңа кітаптардың таныстырылымы zoom бағдарламасы арқылы онлайн жүйесінде өтті. Кітап таныстырылымына облысымыздың көптеген аудандарынан зиялы қауым өкілдері, кітапхана мамандары мен оқырмандар қатысып өз ойларымен бөлісті.
Аталмыш шараға ақын, Қазақстан Жазушылар одағының мүшесі, Қазақстан Республикасы мәдениет саласының үздігі, Тасқала ауданының құрметті азаматы Айтқали Нұрышқалиұлы Нәріков ағамыз, өлкемізге белгілі ардагер – журналист, кітапханамыздың тұрақты оқырманы Серік Ізбасарұлы Ихсанғали ағамыз, Қазақстан Педагогикалық ғылымдар академиясының академигі, М. Өтемісов атындағы Батыс Қазақстан университетінің «Рухани жаңғыру» институтының директоры Абат Сатыбайұлы Қыдыршаев ағамыз қатысып қаламгер, жазбагер Оралбек Ботбайдың атымтай жомарт жан екенін, жастайынан жоқшылық көріп кейін миллионер атанып, өз туған ауылына қол ұшын созып, мұқтаж жандарға көмектесіп, туған жеріне, еліне деген махаббатының биік екенін, өнегелі өмірінен тәлім алуға үйрететін, жас ұрпаққа рухани уыз тәрбие беретін бағыт-бағдары анық, мақсаты биік, еңбектенудің арқасында үлкен жетістіке жеткендігі туралы оқырманға еркін жалпақ тілде жазылған кітаптарын таныстырып, оралымды ой толғады.
Шара барысында «Өмірімнің өзегі – кәсіпкерлік» атты кітап көрмесі жасақталып, кәсіпкердің өмірінен «Өмір-өзен» атты үзінді бейне ролик көрсетілді.