«Асыл сөзді іздесең, Абайды оқы, ерінбе»

Ж.Молдағалиев атындағы облыстық әмбебап ғылыми кітапханасында 14 ақпан күні сағат 10.00-16.00 аралығында Қазақтың ұлы ақыны, композитор, аудармашы, философ һәм қоғам қайраткері Абай Құнанбайұлының 175 жылдығына орай  Қазақстан Жазушылар Одағының Батыс Қазақстан облыстық филиалымен бірлесе ұйымдастырылған «Асыл сөзді іздесең,  Абайды оқы, ерінбе» атты бір күндік оқу марафоны өтті.

Аталмыш шарада сөз алған  ақын, Қазақстан Жазушылар Одағының мүшесі А.Н.Нәріков  Абай Құнанбайұлының оқу мен білім, өнер мен еңбек және туған жердің табиғаты туралы жауһар жырларының жас ұрпаққа берер терең тәрбиелік өнегесі мол екендігін айтып, марафонға қатысушыларды  ұлы ақынның шығармаларын оқуға шақырды.

Шараға Ә.Молдағұлова атындағы №38 мектеп-лецейі, №42 «Ақ ниет гимназиясы»,  №44 Д.Қонаев атындағы мектеп гимназиясынан, №46 ЖОББМ, №47 ЖОББМ, №50 ЖОББМ оқушылары мен Ж.Досмұхамедов атындағы педагогикалық, МЕББМ Республикалық жоғарғы техникалық, Сервис және жаңа технологиялар колледжінің студенттері, сонымен қатар Облыстық балалар мен жасөспірімдер туризмі және экология орталығының тәрбиеленушілері, Облыстық зағип және нашар көретін азаматтарға арналған арнаулы кітапханасының кітапханашысы және Облыстық көру қабілеті бұзылған балаларға арналған арнаулы мектеп-интернатының тәрбиеленушілері, М.Горький атындағы қалалық кітапхананың,  Х.Есенжанов атындағы балалар мен жасөспірімдер кітапханасының кітапханашылары,  оқырмандар, қала тұрғындары қатысып, ақынның сыршыл лирикасымен бірге қара сөздерін оқып, әндерін шырқады. Кешке қатысушылар назарына Абай Құнанбайұлының шығармашылығына  арналған «Кемел ойдың кемеңгері» атты кітап көрмесі шығарылып, бейнеролик қатысушылар назарына ұсынылды.

Бұл марафон Ж.Молдағалиев атындағы облыстық кітапхана ұйымдастыруымен облысымыздың барлық аудандық және ауылдық кітапханаларында күні бойына өтті.