Бүгін 10 ақпан күні Ж.Молдағалиев атындағы облыстық әмбебап ғылыми кітапханада биылғы балалар жылына орай «Балалар әлеміндегі әдебиеттер» атты балаларға арналған кітап көрменің салтанатты ашылуы өтті.
Салтанатты шара республикалық байқаулардың жүлдегері «Гүлдер» би ансамблінің орындауындағы «Қара жорға» биімен ашылды. Шарамыздың құрметті қонақтары ақын, Қазақстан Жазушылар одағының мүшесі, Орал қаласының құрметті азаматы, Халықаралық «Алаш» әдеби сыйлығының иегері Айтқали Нұрышқалиұлы Нәріков және балалар әдебиетіне қалам тербеп жүрген ақын, Қазақстан Жазушылар одағының мүшесі, «Әлішер Науаи атындағы және «Тұран Биримдиги» медалінің иегері «Ақберен» жас ақындар мектебінің жетекшісі Талап Таймасұлы Қуаныш, жазушы, журналист, облыстық Орал өңірі газетінің бас редакторы Бауыржан Файзоллаұлы Ғұбайдуллин балғындарды балалар жылымен құттықтап, ата-аналардың балаларды кітап оқуға баулуының маңыздылығы жөнінде әңгімелеп, балапандарымыздың бақытты болуы біз бен сізге тікелей байланысты екендігін жеткізді.
№41 мектеп лицейінің оқушылары Артурова Ару, Бауыржанқызы Алуа, Айғали Қарақат, Джаналиев Бейбарыс өздерінің кітап, кітап оқу туралы ойларын айтты.
Балалар жылына орай шығарылған «Балалар әдебиеті – ұлт болашағы» және «Бір ел – бір кітап» республикалық акциясы аясында биыл ел болып оқуға таңдалған Ахмет Байтұрсынұлының шығармаларына арналған «Ұлтымыздың ұлы ұстазы» тақырыбындағы кітап көрмелерге кітапханашылар шолу жасады.

Шараға зиялы қауым өкілдері, ұстаздар, ата-аналар, оқушылар және «Дарын» қосымша білім беру орталығының жетекшілері мен оқушылары қатысты.