18-23 сәуір аралығында Ж.Молдағалиев атындағы облыстық әмбебап ғылыми кітапханада «Кітап апталығы» өткізіліп отыр. Осыған орай рухани ой ордасында көптеген іс-шаралар өтуде. Кітап апталығының сәрсенбі күнін Ғылыми әдебиеттер күніне арнадық, дәл бүгінгі күні басталып отырған “Ғалымдар кітапханада” жобасының ашылуы М.Өтемісұлы атындағы БҚУ-нің қауымдастырылған профессоры, филология ғылымдарының кандидаты, «ЖОО Үздік оқытушысы» грантының иегері, «Қазақстан ғылымын дамытуға сіңірген еңбегі үшін» төсбелгісінің иегері, қазіргі қазақ әдебиетінің монографиясы мен оқу құралдарын жазып, Чехия, Греция, Германия, Италия, Франция, Үндістан, Европа, Корея, Түркия т.б. елдердің ғылыми басылымдарына мақалалар жариялап жүрген ғалым Рита Сұлтанғалиеваға арналды.
Шараға арнайы шақырылған Рита Бекжанқызының әріптестері PhD-доктор М.Өтемісұлы атындағы БҚУ-нің «Қазақ филология» кафедрасының меңгерушісі Индира Сұлтаниязова мен Жұбанов атындағы Ақтөбе өңірлік университетінің докторанты Жұмашева Кәмшат ізденімпаз ғалым Рита Бекжанқызының ғылым жолындағы еңбегі жөнінде пікір білдіріп, үлгі боларлық ғалым екенін жеткізді. Магистранттары №41 ЖОББ мектеп – лицейдің мұғалімі Гүлдария Қуанышқалиева мен М.Өтемісов атындағы БҚУ-нің магистранті Балнұр Рысқалиева ғылыми жетекшілерінен алған ілімі туралы әңгімелеп берді.

Жобаның қонағы Рита Бекжанқызы осы ғылым жолына келуіне, ғылымның бастауына әдебиеттанушы ғалым, профессор Серік Мақпырұлының зор үлесі бар екендігін жеткізді. Сонымен қатар ғалым болу үшін ең бірінші мақсат қоя білу керектігін ғылымға келген адам қажеттіліктен емес, мақсатты түрде келіп тынбай жұмыстану керектігін баса айтты.
Шара соңында оқырмандар Рита Бекжанқызынан өздерін ойландырған сұрақтарына жауап алды.

Ж.Молдағалиев атындағы облыстық әмбебап ғылыми кітапхана директорының орынбасары Нұрлыгүл Сағынова сөз сөйлеп, Рита Бекжанқызына шарамызға қатысып, жастарға тағылымды ой айтқаны үшін алғысын білдірді.
Шара барысында «Кітапхана –ғылым, білім ой ордасы» тақырыбында кітап көрмесі шығарылып, оқырмандарға таныстырылды.