Жұбан Молдағалиев атындағы облыстық әмбебап ғылыми кітапхананың ұйымдастыруымен 27-ші қазан күні XVIII ғасырда өмір сүрген қазақтың әйгілі батыры, қолбасшы, жоңғарларға қарсы
азаттық соғысының даңқты қаһармандарының бірі, қазақ әскерінің бас сардары Қаракерей Қабанбай батырдың туғанына 330 жыл толуына орай «Халық батыры Қабанбай» атты портреттік кеш өтті. Шараға Батыс Қазақстан инновациялық-технологиялық университетінің профессоры, тарих ғылымдарының кандидаты Құрманалин Самат Бақытжанұлы, Орал қалалық №40 жалпы орта білім беретін мектебінің қазақ тілі мен әдебиеті пәнінің мұғалімі Сабыр Айнұр Нұржанқызы мен Орал гуманитарлық-техникалық колледжінің 1-2 курс студенттері қатысты. Шара барысында қазақ қолының бас сардары Қаракерей Қабанбайдың ерлік істері мен дипломатиялық шеберлігі туралы тарихшы Самат Бақытжанұлы баяндаса, батыр туралы көркем шығармалардың бірі – Қабдеш Жұмаділовтің «Дарабоз» дилогиясы мен Ілияс Есенберлиннің «Жанталас» романдары туралы Айнұр Нұржанқызы студенттерге тың мәліметтер берді. Сол заманғы жыраулар қазақ халқының жоңғар феодалдарына қарсы азаттық күресін жырлады, халықты бірлікке, ерлікке шақырды, осы күрестің ерлері — Бөгенбай, Қабанбай, Жəнібек батырларды мадақтады. Бұқар, Сарышуаш жыраулардың Қабанбай батырға арнаған өлең жыр жолдарын Орал гуманитарлық-техникалық колледжінің студенттері оқыды. Қаракерей Қабанбай туралы деректермен жасақталған «Тарих тұғырындағы дара тұлға» атты кітап көрме оқырман назарына ұсынылды.