Ж. Молдағалиев атындағы облыстық әмбебап ғылыми кітапханасы 8 наурыз Халықаралық әйелдер күні қарсаңында «Нәзік жүректер нақышы» атты балалар жылы аясында талантты шәкірттер тәрбиелеп, республикалық, халықаралық дәрежедегі көптеген байқаулар мен сайыстарға қатыстырып, өңіріміздің абыройын асқақтатып жүрген нәзік жанды ұстаздармен және жұлдызды шәкірттерімен кездесу кешін өткізді.

Мерекелік шараға шақырылған қонақтарымыз Құрманғазы атындағы Саз колледжінің жоғары санатты қобыз аспабы бойынша арнайы пән оқытушысы, Педагогика ғылымдарының магистрі, ҚР Білім беру ісінің құрметті қызметкері, ҚР Мәдениет қайраткері – Ж.И.Нұрымбетова шәкірттерінің жетістіктері жөнінде айтып, шәкірттері Кәкім Баянсұлу мен Алмуханбетова Даяна қобыз аспабында күй тарту етті. ҚР Мәдениет және ақпарат министрлігінің «Мәдениет саласының үздігі», «Мәдениет майталманы», «Үздік ұстаз» төсбелігісінің иегері, «Бəйтерек» комьюнити орталығының тәрбиешісі – А.А.Құсайынова би өнеріне баулып жүрген шәкірттерінің жетістіктеріне тоқталып, шәкірттері бимен шашу шашты. Мектептен тыс жұмыс орталығының тәрбиешісі, «Әсем-ай» қолөнер үйірмесінің жетекшісі – Э.Тлепова жас тәрбиеленушілерді қолөнерге баулу жөнінде әңгімелесе, шәкірті халықаралық DREAMFEST байқауының «Лучший Тик-Ток» номинациясының гран при иегері Сара Нұрболат өз қолымен тоқылған бұйымды таныстырды. «Шабыт» балалар шығармашылығы орталығының тәрбиешісі, «Жаңа толқын» вокал үйірмесінің жетекшісі – М.Саханова ән өнеріне баулып жүрген шәкіртінің жетістігін айтып, «Жұлдызға қадам» атты республикалық конкурстың бас жүлдегері Саян Қуандық «Мен қазақтың баласымын» әнін шырқады. Сонымен бірге айкидо және каратэмен жаттығушы, айкидодан 7-ші кю иесі, каратэ-до (WKC), бойынша облыс чемпионы – Бақыт Қуаныш айкидодан трюктар көрсетті.

Шара соңында Ж.Молдағалиев атындағы облыстық кітапхана директорының орынбасары Н.А.Сағынова қонақтарды кітапхана ұжымы атынан мерекемен құттықтап, мерекелік сыйлықтар табыстады.
Шара барысында «Әйел – ана тіршіліктің тірегі» тақырыбында кітап көрмесі шығарылды.