Бүгін Ж.Молдағалиев атындағы облыстық әмбебап ғылыми кітапханасында мемлекет және қоғам қайраткері Рахметолла Хамитұлы Сүйербаевтың жеке кітапханасынан облыстық кітапханаға сыйға тартқан кітаптарының таныстырылымы өтті.

Еліне адал қызмет етіп, туған жерінің гүлденуіне сүбелі үлес қосқан азаматтардың бірі – еңбек ардагері, мемлекет және қоғам қайраткері болған Рахметолла Хамитұлы Сүйербаевтың есімі – Ақ Жайық жұртына кеңінен танымал. Шара барысында Р. Сүйербаевтың жеке кітапханасынан облыстық кітапханаға тарту етілген мыңнан астам кітаптарының және биылғы жылы тұсауы кесілген «Ізгі ғұмыр» кітабы таныстырылды. «Ізгі ғұмыр» кітабы – қатардағы қарапайым ұстаздан қоғам, мемлекет қайраткері деңгейіне көтерілген, еліне елеулі еңбек сіңірген Рахметолла Хамитұлы туралы. Мұнда Р.Сүйербаев туралы мемлекет қайраткерлері И.Тасмағамбетов, Қ.Көшербаев, Қ.Сұлтановтың естеліктері берілген. Бұл іс-шараның тізгінін ұстаған БҚО әкімдігі Ішкі саясат басқармасының «Қоғамдық келісім» КММ басшысы Медхат Мұсаұлы байыппен әсерлі жүргізді. Шараға арнайы келген Р. Сүйербаевтың отбасылық достары, көзін көрген әріптес іні-қарындастары асыл азамат туралы жарқын естеліктерімен бөлісті. Р.Сүйербаевтың жеке кітапханасынан облыстық кітапханаға сыйға тартылған кітаптарынан құрылған кең көлемді «Тұғырлы тұлға, ғибратты ғұмыр» тақырыбындағы кітап көрмесі ұйымдастырылып, кітапханашы Ж.Қанатқалиева шолу жасады. Кітапхана қызметіне көңілі толған Р.Хамитұлының зайыбы Мария Темірғалиқызы, інісі Роберт Хамитұлы және баласы Ғарифолла Рахметоллаұлы кітапхана ұжымына ризашылығын білдірді. Ж.Молдағалиев атындағы облыстық әмбебап ғылыми кітапханасының директоры Шолпан Уразаева Сүйербаевтар әулетіне алғысын білдіріп, алдағы уақытта бұл кітаптар кеңінен насихатталатынын жеткізді.

Бұл шараға Р.Сүйербаевтың отбасы, замандастары, қызметтес болған достары, кітапхана оқырмандары және БАҚ өкілдері қатысты.