«Жұбанның жыры – ғасырлар үні» атты халықаралық онлайн ғылыми-практикалық конференция

2020 жылдың 26 қыркүйегі күні БҚО әкімдігінің, БҚО мәдениет басқармасының, Ж.Молдағалиев атындағы ОӘҒК-ның ұйымдастыруымен М.Өтемісов атындағы Батыс Қазақстан университетінің мәжіліс залында «Жұбан жырлары – ғасырлар үні» атты халықаралық онлайн ғылыми конференциясының өтті.
Конференция карантиндік жағдайларға байланысты ZOOM платформасында, фэйсбукте тікелей эфирде өткізілді. Конференцияны модератор, педагогика ғылымдарының докторы, профессор, ҚПҒА академигі Қыдыршаев Абат Сатыбайұлы жүргізді. Конференцияның пленарлық отырысында ақынның сан алуан тақырыптағы шығармалары мен еңбектерін оқып, ақындығына, азаматтығына, ерлігі мен талантына тағзым етіп, халықаралық деңгейде Жұбан ақынның шығармашылығына баға беріліп, жұбантану бағытында жүргізіліп жатқан жұмыстар зерделенді.
Батыс Қазақстан облысының әкімі Ғ.Н.Есқалиев пен Жұбан ақынның ұлы Азамат Жұбанұлы Молдағалиев құттықтау сөз сөйлеп конференция жұмысына сәттілік тіледі. Қазақстан Жазушылар одағының төрағасы Ұ.Есдәулет «Жұбан Молдағалиев – қазақтың қыран ақыны» тақырыбындағы баяндамасында Жұбан ағамыздың әрбір өлеңі – ел тағдырын, тарихын, халықтың мұң-мұқтажын, ерлігі мен батырлығын, жырлап, оны келешек ұрпаққа жеткізген жанды шежіре екенін айтса, ақын Ақұштап Бақтыгереева «Ұлттық рухтың жыршысы» баяндамасында «Қазақ әдебиетіне өзіндік үнмен келген, қазақ әдебиетін өзінің поэмаларымен, жырларымен байытқан Жұбан ақынның “Мен-қазақпын, мың өліп, мың тірілген…” деп басталатын өлең жолдары тарихта мәңгілік қалды. Ақынның кешегі Желтоқсан кезіндегі азаматтық ерлігі ешқашан да ұмытылмақ емес. Жұбан ақын тәуелсіздікті көре алмай кетті. Бірақ ол – егемендік жолында барын сала күрескен қазақтың қайсар ұлдарының бірі»,-деді. Мәскеу қаласынан онлайн байланысқа қосылған ақын, аудармашы Татьяна Кузовлева өз сөзінде Жұбан Молдағалиевтің отбасымен достық қарым-қатынасын, В.Савельевпен шығармашылық байланыста болғанын айтса, «Жұбан және Түркия елі ақындарындағы үндестік» атты Мерсин университетінің профессоры Али Арсланның баяндамасында қазақ ақыны Жұбан туындыларында сөз болған күллі адамзатқа ортақ өзекті мәселелердің Түркия елі ақындарының шығармаларында да үндестік тапқаны нақты мысалдармен берілген, ал Әзербайжан Ғылым Академиясының профессоры Саилов Галиб Әмірағаоғлу «Ақын Жұбан Молдағалиев және әлемдік әдебиеттегі аударма мәселесі» тақырыбындағы баяндамасында әлемдік әдебиеттегі аударма мәселесі, қазіргі әзірбайжан әдебиетінің поэзия жанрының даму деңгейі және ақын Жұбан Молдағалиев өлеңдерінің әзірбайжан тіліндегі аудармалары хақында айтып өтті.
Сонымен қатар, музыкалық балалар мен жасөспірімдер театрының директоры Асхат Маемиров «Жұбан Молдағалиев поэзиясындағы елдік пен руханият», А.Қыдыршаев «Жұбан» энциклопедиясы: құрылымы, танымдық-тағылымдық мәні», ҚР Ұлттық академиялық кітапханасының директоры Ү.Мұңалбаева «Востребованность поэзии Жубана Молдагалиева», ҚР Ұлттық кітапханасы директорының ғылыми хатшысы Б.Жүнісбеков «Өмірін жырмен жырлаған», Х.Досмұхамедов атындағы Атырау МУ профессоры Жүсіп Қадыр «Ақын Жұбан Молдағалиев шығармаларындағы майдан тақырыбы», С.Бәйішев атындағы Ақтөбе университетінің тәрбие және әлеуметтік мәселелер жөніндегі проректоры, филология ғылымдарының кандидаты, доцент Миров Мұхтар Орынбасарұлы «Жұбан Молдағалиев туындыларының лингвокогнитивтік сипаты» тақырыптарында баяндама жасап, сөз сөйледі. Сондай-ақ, зиялы қауым өкілдері, әдебиетші, жұбантанушы, ғалымдар, облысымыздың кітапханалары онлайн режимде қатысты.