Еліміздің ардақтысы, ұлтымыздың ұлы тұлғасы, майдангер ақын, қаһарман Жұбан ағамыздың соңында қалған ұрпағы, асылдың тұяғы – Азамат Жұбанұлының өмірден өткені туралы суық хабарды естіп, Жұбан Молдағалиев атындағы Батыс Қазақстан облыстық кітапханасының ұжымы атынан аяулы апамыз Софья Мәлікқызына, сүйікті жары Айгүл Идиянқызына, ұрпағына, туған-туыстарына қайғыларына ортақтасып көңіл айтамыз.
Анық та ақырын басып, байыпты мінезімен айналасын мейірім шуағына бөлеп жүретін Азамат Жұбанұлы Жұбан Молдағалиев ағамыздың 100 жылдық мерейтойында отбасымен елге келіп, әкесіне көрсетілген халықтың құрметіне перзенттері атынан үлкен ризашылығын білдіріп кеткені көз алдымызда. Жаны жайсан, жүрегі үлкен тұлға, Софья апамыздың тірегі, қамқоры болған азамат өмірден өтті. Дүниеден жақсы адам өткеніне көңіліміз құлазып, жанымыз ауырып, жүрегіміз сыздауда.

Шаңырағының шырақшысы Софья апамыз бен Айгүл Идиянқызына, көзінің нұрындай қос құлыны Дина мен Данияға, жиендеріне ауыр қазаға шыдайтын сабыр мен қуат берсін!
Марқұмның жатқан жері жайлы, топырағы торқа болсын!

Ж.Молдағалиев атындағы облыстық әмбебап ғылыми кітапханасының директоры Шолпан Қуанышқалиқызы Уразаева.