2021 жылдың 21 қазан күні сағат 15:00-де Ж. Молдағалиев атындағы облыстық әмбебап ғылыми кітапханасының ұйымдастыруымен Тәуелсіздіктің 30 жылдығы мен Жұбан Молдағалиев атындағы облыстық кітапхананың 150 жылдығына арналған «Жұбан оқулары» аймақтық байқауы өтті. Шараға орай «Жырлары жасай берер Жұбан ақын» атты кітап көрмесі жасақталды.«Жұбан оқуларының» мақсаты: 2000-жылдан бері Батыс Қазақстан облыстық кітапханасы есімін мақтанышпен алып келе жатқан Қазақстанның Халық жазушысы КСРО және Қазақстан Мемлекеттік сыйлықтарының лауреаты, қазақтың ақиық ақыны Жұбан Молдағалиевтың ұрпағына қалдырған мұрасын жас оқырмандар арасында сайыс арқылы насихаттау; Жұбан шығармаларымен жастардың бойына ақыл мен парасатты, сөз құдіреті мен көркем сөздің мәйегін сіңіру, оқу шеберлігін, тіл мәдениетін жетілдіру; ұлыларды құрметтеу, даналардың даралығын бағалауға үйрету; жастардың шығармашылық қабілеттерін, эстетикалық талғамын, тұлғалық мәдениетін дамыту; жастарды қанымызда бар шешендікті, тауып сөйлер тапқырлықты, ұлттық ерекшелігімізді қастерлей білуге баулу.Биылғы «Жұбан оқуларының» ерекшелігі: еліміздің батыс аймағының, яғни Ақтөбе, Атырау, Маңғыстау және Батыс Қазақстан облыстарының жас кітапханашылары қатысып отыр.Ж.Молдағалиев атындағы облыстық кітапхана жариялаған «Жұбан оқулары» аймақтық байқауының I-турына 30-ға тарта, 17-35 жас аралығындағы жас кітапханашылар онлайн форматта қатысып, байқау талаптарына сай Жұбан ақынның бір өлеңін мәнерлеп оқыған видео және ақынның өмірі мен шығармашылығын насихаттау бағытындағы бір кітапханалық жұмысын, сонымен қатар мерзімді баспасөз бетінде берілген Жұбан мұраларының бүгінгі күнмен үндестігі туралы жазылған мақаласының сканерленген нұсқасы жолданған болатын. Осы жұмыстарды жолдаған қатысушылардың ішінен 10 қатысушы: Азбантаева Фарида Бердіғалиқызы (БҚО, Бәйтерек ауданы), Айдынғали Мәлика Балғабайқызы (Ақтөбе облысы, Байғанин ауданы), Айнадин Құралай (Ақтөбе облысы, Шалқар ауданы), Аққалиева Камшат Меңдіғалиқызы (Атырау облысы, Атырау қаласы), Жаимова Мөлдір Габдилгалимовна (БҚО, Шыңғырлау ауданы), Искакова Назгүл Қайырбековна (БҚО, Бөрлі ауданы),Қаратаева Ақнұр Маратқызы (БҚО, Бәйтерек ауданы), Құбайтова Дана Сансызбаевна (БҚО, Ақжайық ауданы), Мекебаева Жанұр Серікқызы (Маңғыстау облысы, Бейнеу ауданы), Шабақова Құралай Губайдуллаевна ( БҚО, Жаңақала ауданы) оза шауып, жеңімпаз атанды. Байқауға М.Өтемісов атындағы БҚУ-ң доценті,филология ғылымының кандидаты Мүтиев Зейнолла Жақсылықұлы, Хамза Есенжанов атындағы облыстық балалар мен жасөспірімдер кітапханасының кітапханашысы, мәдениет саласының ардагері Өтешева Звайда Бисенқызы, Ж.Молдағалиев атындағы облыстық кітапхана директорының орынбасары Сағынова Нұрлыгүл Аяпқызы қазылық етті. II турдың 1,2 кезеңінде қатысушылар блиц-сұрақтарға дұрыс жауап беру арқылы таңдалды. «Жұбан оқулары» байқауының қорытындысы бойынша:Бас жүлде – Құбайтова Дана Сансызбаевна (БҚО, Ақжайық ауданы) ;I орын – Айнадин Құралай (Ақтөбе облысы, Шалқар ауданы); 2 орын – Аққалиева Камшат Меңдіғалиқызы (Атырау облысы, Атырау қаласы); 3 орын – Мекебаева Жаннұр Серікқызы (Маңғыстау облысы, Бейнеу ауданы) жүлделі орындарға ие болып, ал қалған қатысушылар «Алғыс хатпен» марапатталды.Жеңімпаздарды марапаттау Батыс Қазақстан облыстық филармониясының үлкен залында өтті.