23 сәуір – Бүкілдүниежүзілік кітап және авторлық құқық күніне орай Ж.Молдағалиев атындағы облыстық әмбебап ғылыми кітапхана алаңында «KITAPFEST -2022» кітап фестивалі өтті.
Кітап фестивалінің ашылу салтанатына БҚО мәдениет басқармасы басшысының орынбасары Қ.Ж.Мұханғалиев және Махамбет Өтемісұлы атындағы БҚУ-нің «Рухани жаңғыру» институтының директоры, педагогика ғылымдарының докторы, профессор, Қазақстан Педагогикалық ғылымдар академиясының академигі А.С.Қыдыршаев қатысып, барлық кітапхана ұжымы мен оқырмандарын айтулы мерекемен құттықтап, жылы лебіздерін білдірді.

Шараға «Нарын сазы» вокалдық тобы, «Мектептен тыс жұмыс орталығы» өнерпаздары және «Шабыт» би ансамблінің бишілері атсалысты. Сонымен қатар Жәңгір Нұрсана «Таңғажайып өмір» әнімен шараны әсемдеді.

Фестиваль барысында «Асыл мұра», «Ашық аспан астындағы мерзімді басылымдар», «Бірге оқиық – бірге ойнайық», «Интерактивті кардмейкинг», «BookCrossing», «Ертегілер елінде» алаңдары ұйымдастырылып, түрлі шаралар өткізілді. Көрермендер «Кім епті?» ойынын ойнап, викториналық сұрақтар, мақалды жалғастыру ойындарын, сондай-ақ басқатырғыштар, сөзжұмбақтар мен түрлі ребустарды қызыға шешті. Келген кішкентай оқырмандарымыз бен жас жеткіншектер кітапханамыздың оқырманы тізіміне енді.
Осы мерекеде кітапханамыздың тұрақты оқырмандары түрлі номинациялар бойынша марапатталды.

Кітап фестиваліне зиялы қауым өкілдері, жастар, кітапхана оқырмандары, мектеп оқушылары, қала тұрғындары қатысты.