Бүгін, Ж.Молдағалиев атындағы облыстық әмбебап ғылыми кітапханада 14 наурыз – Көрісу күніне арналған «Көрісу – ізет пен ілтипат» атты тағылымдық шара өткізілді.
Көрісу жастардың үлкенге құрметі мен ілтипатының көрінісі ретінде бүгінгі шарамызда аға буын өкілдері Ж.Молдағалиев атындағы ОӘҒК 25 жыл басқарған «Кітапхана саласының ардагері», «Еңбек ардагері» төсбелгісінің иегері Жұмақаева Гүлжан Төлегенқызы, Ж.Молдағалиев атындағы ОӘҒК басшылық еткен, «Мәдениет саласының үздігі», «Кітапхана ісінің шебері» төсбелгілерінің иегері, «Қазақстан Тәуелсіздігіне 30 жыл» мерекелік медальінің иегері Исатаева Роза Жақияқызы, кітапханамыздың ардагері «Құрмет» грамотасының иегері, «Мәдениет саласының үздігі», «Кітапхана ісінің шебері» төсбелгісінің иегері Кенжебаева Сара Көшәліқызы, кітапханамыздың ардагері Сейткереева Злиха Қабдықалиқызы саламыздағы жас кітапханашылармен кездесті. Шара барысында қаламыздағы Әжелер ансамблінің мүшелері көрісу, амал күні жөнінде кеңінен насихаттап, ән шырқады. «Кітапхана ісінің ардагері» төсбелгісінің иегері, кітапханамыздың суретшісі А.Мұсаұлы құттықтап, домбырамен ән салды. Мерекелік шараға қатысушыларға «Салт-дәстүрді білеміз бе?» атты викториналық сұрақтар қойылып, сыйлықтар тарту етілді. Кітапханашы мамандар қазақ биін билеп, мерекелік әндер шырқады. «Көрісу – ізет пен ілтипат» атты тағылымдық шараға арнайы шақырылған құрметті қонақтарымыз кітапхана мұражайына саяхат жасады. Аталмыш шарада «Наурыз құт-береке әкелсін!» тақырыбында кітап көрме шығарылды.