Бүгін, 14 қазан күні Ж.Молдағалиев атындағы облыстық әмбебап ғылыми кітапханада «Ғалымдар кітапханада» жобасы аясында М.Өтемісов атындағы БҚУ-нің доценті, тарих ғылымдарының кандидаты Боранбаева Бақтылы Сансызбайқызының «Капустин Яр» әскери полигоны: Қазақ депортациясы» атты кітабының тұсаукесері өтті.
Іс-шараны М.Өтемісов атындағы БҚУ доценті, тарих ғылымдарының кандидаты, «Ерен еңбегі үшін» медалінің иегері, облыстық мәслихаттың депутаты Жаңабек Жақсығалиев жүргізді. Шара Құрманғазы атындағы саз колледжі студенттерінің орындауында «Елім – ай» әнімен ашылды. Оқырманға жол тартқан жаңа кітаптың лентасын тарих ғылымдарының докторы, профессор Ә. Тасмағамбетов, тарих ғылымдарының докторы, профессор М. Сдыков, БҚО ардагерлер кеңесінің төрағасының орынбасары Ә. Габбас және Орал қалалық ардагерлер ұйымының төрағасы, «Ауыл» халықтық демократиялық патриоттық партиясының БҚО филиалының төрағасы, сыбайлас жемқорлыққа қарсы агенттіктің мүшесі М. Әнесов кесіп, құттықтау сөз сөйледі.
ҚР Ұлтық Ғылым Академиясының академигі, тарих ғылымдарының докторы, профессор Х. Әбжанов пен Тарих ғылымдарының кандидаты, Шәкәрім университетінің профессоры М.Каримовтың кітапқа арналған тілектері экраннан көрсетілді.
Өз кезегінде сөз алған бір топ ардагерлер Н. Иманғалиұлы, А. Хамзин, Р. Көбейсінова, М. Жұматова және Орал қаласының ішкі саясат бөлімінің бас маманы А.Ілиясқызы БҚИТУ профессоры, филология ғылымдарының докторы М.Сабыр, тарих ғылымдарының кандидаты, БҚИТУ профессоры С. Құрманалин және М.Өтемісов атындағы БҚУ-нің тарих кафедрасының меңгерушісі А. Байболсынова кітап авторының бұдан әрі жазар дүниелері, бағындарар биігі көп болсын деген баталарын беріп, өте жақсы пікірлер білдірді. Жаңа кітапқа жақсы баға беріп, қарымды қалам иесі болуға ақ тілектерін жаудырды.
Монографияның авторы Б.Сансызбайқызы кітап туралы айтып, осы кітаптың шығуына атсалысқан, қолдау көрсеткен жандарға алғысын білдіріп, кітапханаға жаңа кітаптарын сыйлады.
Ж.Молдағалиев атындағы облыстық әмбебап ғылыми кітапхана директорынның орынбасары Ұ.Жиеналиева қорытынды сөз сөйлеп, кеш қонағына естелік сыйлық тарту етті.
Шарада Б.Сансызбайқызының өмірі мен шығармашылығына арналған бейнебаян көрсетіліп, «Мейірімді ұстаз, мерейлі ғалым» тақырыбында кітап көрмесі шығарылды. Құрманғазы атындағы Саз колледжінің және М.Өтемісов атындағы БҚУ-нің студенттері режиссура мамандығының студенттері кітаптағы жазбалардан естелік хаттарын оқыды. Кітаптың тұсаукесеріне арналған рухани шараға ғалымдар, оқытушылар, магистранттар, студенттер және БАҚ өкілдері қатысты.