23 қыркүйек күні Ж.Молдағалиев атындағы облыстық әмбебап ғылыми кітапханада «KitapTime-2022» жалпы республикалық кітап фестивалінің ашылуы өтті.
Фестиваль zoom платформасында Қазақстан Республикасының Мәдениет және спорт министірі Д.Абаевтың құттықтау сөзін тыңдаумен ашылды.
Салтанатты шарада сөз алған ақын, Халықаралық «Алаш» әдеби сыйлығының иегері, Орал қаласының Құрметті азаматы А.Нәріков пен М.Өтемісов атындағы Батыс Қазақстан университетінің аға оқытушысы С.Мұратқызы өскелең ұрпақ Қазақстанның болашағы екенін, оның көркеюіне үлес қосу дегеніміз білімді ұрпақ екенін, білімді болу үшін кітапты көп оқу керек, – деп жастарды кітап оқуға шақырды. Шараға қаламыздағы ЖОО студенттері, «Шабыт» би ансамблінің кіші тобы, мектептен тыс жұмыс орталығының тәрбиеленушілері қатысып, өнерлерін көрсетті. Облыстық кітапхана директоры Ш.Уразаева сөз сөйлеп, қатысушыларды алғыс хаттармен марапаттады.
Фестиваль аясында «Қазақ әдебиетінің тарланы – М.Әуезов», «Жаңа әдебиеттер – Сіздер үшін», «Балалар әдебиетінің әлемі», «Ұлттың ұлы ұстазы А.Байтұрсынов», «Атадан қалған асыл мұра» тақырыбында кітап көрмелері шығарылды.