Ж.Молдағалиев атындағы облыстық әмбебап ғылыми кітапханада 7 желтоқсан күні «Ғалымдар кітапханада» жобасы аясында Батыс Қазақстан инновациялық технологиялық университетінің профессоры, филология ғылымдарының докторы, ҚР Білім беру ісінің құрметті қызметкері Сабыр Мұрат Бөкенбайұлымен «Тағылымы мол ұстаз-ғалым» атты кездесу кеші өтті.
Кездесуді Батыс Қазақстан инновациялық технологиялық университетінің «Филология және оқыту әдістемесі» кафедрасының қауымдастырылған профессоры, филология ғылымдарының кандидаты Азамат Мамыров мағыналы да, мәнді жүргізіп, ғалым еңбегін еліміз бен өлкеміздің тарихи баспалдақтарымен байланыстыра білді.
Ақын, Қазақстан Жазушылар одағының мүшесі, «Ерен еңбегі үшін» медалінің иегері Ғайса-Ғали Сейтақ, белгілі ғалым, п.ғ.д, профессор, Қазақстан Педагогикалық ғылымдары академиясының академигі, М.Өтемісов атындағы БҚУ-нің «Рухани жаңғыру» институтының директоры – Абат Қыдыршаев, М.Өтемісов атындағы БҚУ-нің қауымдастырылған профессоры, ф.ғ.к, доцент Зейнолла Мүтиев, ҚазГУ-дің түлегі, курстасы Люба Құсайынова, өңірімізге белгілі ұлағатты ұстаз, ҚР Білім беру ісінің құрметті қызметкері Қырымжан Жақыпова кешке қатысып, ғалым туралы жылы лебіздерін білдірді. Сондай-ақ кеш қонағына студент жастар әртүрлі сұрақтарын қойды.
Ғалымның өмірі мен шығармашылығына арналған «Ұстаз, ғалым, тәлімгер» тақырыбында кітап көрмесі ұйымдастырылды.
Шара соңында кітапхана директоры сөз сөйлеп, естелік сыйлық тарту етсе, Мұрат Бөкенбайұлы ұйымдастырушыларға, барша қатысушыларға өз алғыс-сезімін білдіріп, кітапханаға қолтаңба жазып кітабын сыйлады.