8 желтоқсан күні М.Өтемісұлы атындағы Батыс Қазақстан университетінің Ғылыми кітапхана ұжымы мен Ж.Молдағалиев атындағы облыстық әмбебап ғылыми кітапхананың ұйымдастыруымен Қазақстанның Еңбек ері, ҚР Мемлекеттік сыйлығының және «Тарлан» сыйлықтарының, «Достық», «Құрмет» ордендерiнің иегері, Қазақстанның Құрметті жазушысы, драматург Дулат Исабековтың 80 жасқа толуына орай «Қаламы қарымды әдебиет майталманы» атты әдеби-сахналық кеш болып өтті. Шара барысында Дулат Исабековтің өмірі туралы бейнеролик және «Фильм үзінділері» бейнебаян көрсетілді. Жазушының шығармашылық жолы мен көркем туындылары туралы М.Өтемісов атындағы БҚУ профессоры, филология ғылымдарының кандидаты З.Мүтиев кеңінен тоқталып өтті. «Әдебиеттің ең ауыр да, күрделі жанры драматургия. Қазіргі кезде бүкіл әлемде жаңа заманға бейімделу, жаңа құндылықтарды дәріптеуге бет бұрғандық байқалады. Яғни, алда үлкен өзгерістер күтіп тұр. Жастарды осы қиын да күрделі сала драматургияға тарту, тәрбиелеу керек. Себебі, қазіргі кезде қазақ драматургтары саусақпен санарлықтай», – деген екен Д.Исабеков бір сұхбатында. «Мұрагер» театры қойған Д.Исабековтің шығармашылығынан алынған «Түйетауық пен домино» туындысы көрерменге керемет әсер қалдырды. Қоюшы режиссер: Мәдениет және өнер факультетінің 5 курс студенті Тасболатов Айдос. Рөлде ойнағандар: Бейбітов Айбек, Жанатов Нұрдәулет, Елемесова Жанар, Ермұхан Айжұлдыз, Жолдасова Шамшырақ, Құрманғалиев Ахмадияр, Жасқайратұлы Нұршат, Кубашева Назгүл. Кеш соңында М.Өтемісов атындағы БҚУ ғылыми кітапханасының директоры Тоты Еркінқызы БҚУ профессоры Зейнолла Жақсылықұлына және Мұрагер театрының студенттеріне алғыс білдірді. Сонымен қатар Ж.Молдағалиев атындағы ОӘҒК директорының орынбасары Ұрқия Кенжебайқызы белсенділік танытып қатысқан студенттерді алғыс хаттармен марапаттады.