16 маусым күні Ж.Молдағалиев атындағы облыстық әмбебап ғылыми кітапханасы жазушы, аудармашы, Халықаралық «Алаш» әдеби сыйлығының лауреаты Мұқадес Есламғалиұлының шығармашылығына арналған Сырым аудандық ОКЖ ұйымдастырған «Кемел ойлы, көркем сөзді жазушы» тақырыбындағы әдеби кешке ZOOM платформасында қосылып, бірлескен шара өткізді.
Аталмыш шараға ақын, Халықаралық «Алаш» әдеби сыйлығының лауреаты, Орал қаласының құрметті азаматы Айтқали Нәріков, педагогика ғылымдарының кандидаты, профессор, «Құрмет» орденінің иегері, ардагер ұстаз, Мұқадес Есламғалиевтың шығармашылығына арналған «Ұмытылмас, өшпес бейне» облыстық шығарма байқауының комиссия төрағасы Нәсіпқали Даулетов, Алматы қаласынан келген Мұқадес ағамыздың шаңырағының түтінін түзу шығарып, отын өшірмей отырған сүйікті жары Мұхсина Әбуқызы, Батыс Қазақстан инновациялық-технологиялық университетінің профессоры, филология ғылымдарының докторы Мұрат Сабыр, жазушының ауылдасы, зейнеткер, қалалық ардагерлер кеңесінің мүшесі Сабыржан Калиев, жазушының туысы Бауыржан Есламғалиев отбасымен, жазушының балдызы Ұмсындық Төлегенова, «Ұмытылмас өшпес бейне» облыстық шығарма байқауының жеңімпазы Айнұр Куанышкалиева қатысты.
Шарада сөз алған қонақтар жазушының шығармаларына тоқталып, естеліктірімен бөлісті. ZOOM арқылы облыс көлеміндегі барлық кітапханалар онлайн байланысқа шықты. Шара соңында облыстық кітапхана директоры Шолпан Оразаева шараға қатысқан қонақтарға алғысын білдірді.
«Орамды ой, қарымды қалам иесі – Мұқадес» тақырыбында кітап көрмесі шығарылды.