2022 жылдың 9 сәуір күні Ж.Молдағалиев атындағы облыстық әмбебап ғылыми кітапханада «Парасат жолы» аясында «Ақын – елдің ардағы» атты ұрпақтар сабақтастығын жалғастыру бағытында қос буынмен өткен «Мирас» рухани танымдық орталығының отырысы болып өтті.
Шараға ақын-ұстаз, Жұбантанушы, ҚР білім беру ісінің үздігі Үзілдік Елеубайқызы, ақын, Қазақстан Жазушылар одағының мүшесі, Әлішер Науаи атындағы және «Тұран Биримдиги» медальінің иегері, «Ақберен» жас ақындар мектебінің жетекшісі Қуаныш Талап Таймасұлы, айтыскер ақын, Қазақстан Жазушылар одағының мүшесі, «Абай» мерейтойлық медалінің иегері, Халықаралық «Шабыт» фестивалінің лауреаты, «Еңбек даңқы» төсбелгісінің иегері, «Жан дауыс», «Қылшыққұм» жыр жинақтарының авторы, Қадыр Мырза Әли атындағы мәдениет және өнер орталығының қызметкері Талғат Мықи, облыс ақыны, Халықаралық айтыс ақындарымен жыршы-термешілер одағының мүшесі, «Сырым Датұлы» төсбелгісінің иегері, Республикалық айтыстардың жүлдегері Мейірман Шакенов, Мусина мектебіндегі «Ақындық өнер» үйірмесінің мұғалімі Сұлтанмахмуд Айдана Мэлсқызы және ақын ағалары мен апаларының ізін жалғар жастар «Ақберен» жас ақындар мектебінің, Мусина мектебінің тәрбиеленушілері, «Шабыт» мектептен тыс жұмыс орталығының балғындары қатысты.
Ақжайық елінде таланттылардың көшін жалғап, жастар поэзиясында өзінің сыршыл да әдемі жырларымен елге танылатындар қатары өсіп келеді. Бүгінгі аға буын мен жас буын арасындағы рухани сұхбат салихалы ұрпақтар сабақтастығына ұласты.

«Ақберен» ақындар мектебінің, Мусина мектебіндегі «Ақындық өнер» үйірмесінің, «Шабыт» мектептен тыс жұмыс орталығының шәкірттері өз жүректерінен шыққан жыр шумақтарын және сүйікті ақындарының өлеңдерін оқып берді.
Шара соңында Ж.Молдағалиев атындағы облыстық әмбебап ғылыми кітапхана директорының орынбасары Нұрлыгүл Сағынова қорытынды сөз сөйлеп, алғысын білдірді.
Ақын шығармашылығы өз бояуын жоғалтпайтын, шындықты ту ететін, тек биік шыңдарды бағындыратын туындылар екендігі қақ. Ақындығы мен азаматтығын тең ұстайтын, елдің сөзін сөйлеп, жоғын жоқтайтын өздеріңіздей ақындарымыз көбейе берсін!