28 қаңтар күні кітапханада «Саналы өмір сүру жүйесі» атты «Меркурий» спикерлік клубының кезекті отырысы өтті. Кездесудің қонағы — Еркеналиева Гүлзара Қадырбайқызы, аудитор, қаржы саласының маманы және «Тиімді тұлғаның күнделігі» кітабының авторы.

Кездесу барысында спикер өзінің кәсіби жолы туралы айтып, аудит саласына қалай келгенін және бүгінгі таңда қаржылық сауаттылық тақырыбының жастар үшін неге аса өзекті екенін түсіндірді. Сондай-ақ ақшаға саналы көзқарас қалыптастыру, пайдалы қаржылық әдеттерді дамыту және табыс пен шығысты есепке алудың жеке жүйесін құру мәселелеріне ерекше назар аударылды.

Гүлзара Қадырбайқызы «Тиімді тұлғаның күнделігі» кітабын таныстырып, оның қаржы мен өмірде тәртіп орнатуға, жоспар құруға, мақсат қоюға және күйзеліске түспей, қысымсыз алға жылжуға көмектесетін практикалық құрал екенін атап өтті.